23 сәуір – Халықаралық кітап және авторлық құқық күніне орай М. Жаманбалинов атындағы орталық балалар кітапханасымен Малайсары батыр атындағы ЖОББМ бірлесіп «ReadX» мерекелік шара өткізді. Шараға жазушы, аудармашы, Қазақстан Жазушылар Одағының мүшесі Айбек Тілеубекұлы Оралхан қатысты. Шара барысында Малайсары батыр атындағы ЖОББМ-нің басшысы Сыздықов Азамат Жанайдарұлы Есенберлиннің «Көшпенділер», Жақанова Сағыныш Жылқайдарқызы Роза Мұқанованың «Мәңгілік бала бейне», 9 «А» сынып оқушысы Негматолла Инсанна Б. Соқпақбаевтың «Өлгендер қайтып келмейді» атты кітаптары туралы әңгімеледі. Оралхан Айбек Тілеубекұлы Амантай Тойшыбайұлының «Адам бол» атты кітабынан мотивация туралы ақыл нақылдарынмен таныстырып, Қалқаман Саринның «Жақсылық жаса» өлеңін және «Алты аңғар» өз кітабынан «Қаяу» өлеңін оқып берді. Осы мерекеге орай М. Жаманбалинов атындағы орталық балалар кітапханасының қызметкерлері кітапхана қорынан кітапхананың тұрақты оқырмандарына кітап көрмесін ұйымдастырды. Кітап – адам баласы ақыл-ойынан туған рухани байлықты сақтап, оны ұрпақтан ұрпаққа жеткізіп отыратын құрал, білім мен тәрбие екені туралы қысқаша айтып, кітап оқуға кеңес берді; Дүниежүзілік кітап күнінің пайда болу тарихымен және әр жазушының авторлық құқығын қорғау міндетімен таныстырды.
